Eph 1 | KYG | STEP | Nagaemo Polo'nae'mo Goti'a hau'nigeno lekana paino nate'nige'na Yesu Kalaisi apa veka'amo mai'nove. Efasasi taonifi'mo mai'naya vaya'mogitapamo Kalaisi Yesupi'mo mai'netapae'mo lapakesa afita fatago nehageno Goti'a lapavaleno alino lapaote lapate'niya vaya'amogitae'mo mani avo'mo nekaove.

Ephesians 1

1 Nagaemo Polo'nae'mo Goti'a hau'nigeno lekana paino nate'nige'na Yesu Kalaisi apa veka'amo mai'nove. Efasasi taonifi'mo mai'naya vaya'mogitapamo Kalaisi Yesupi'mo mai'netapae'mo lapakesa afita fatago nehageno Goti'a lapavaleno alino lapaote lapate'niya vaya'amogitae'mo mani avo'mo nekaove. 2 Afotimo Goti'e Ala kava netimo Yesu Kalaisi'e'mo fiku lapa mae'ana lapami'anageno lapaipamo'mo falu hino.

Goti'a Kalaisiteti'mo muki alagepa ya'amo ago alino lami'niya gemae.

3 Goti agi'ale'mo Ala kava netimo Yesu Kalaisi Afo'amo Goti agi'ale'mo alita asaga huta amuse higetao. Lagaemo Kalaisipi'mo mai'nonageno'ae'mo Goti'a muki alagepa ya'amo koku'na kotega nehaneya ya'amo laulagafati'mo o'age'nona ya'mo ago alino lami'niye. 4 Ema akeya'vilaga ma mopamo alo osu'niya afina'mo Goti aulagale'mo laote vaya'amo mai'nisunageno'ae'mo hosu kavatimo alagi ohanesiyafe'mo Kalaisipi'mo mai'naya vayane, huno lekana paino late'niye. 5 Agaemo lagaefe'mo hau ayamopafi'mo hau'nigeno hogoteno huno'ae'mo, nahau'niyanage'a Yesu Kalaisiteti'mo nagai'nilefe'mo mafa'ne'nimo maigae, huno lokiya ge hu male'niye. 6 Fiku laha maeno lami'niya ha le konali ya'amo alino apave lisige'apae'mo agete'a agi'ale'mo ali'a asaga hu'a atesayafe'mae. Agaemo hau ayamopafi'mo hau'niya mafa'ne'aleti'mo ani kava'mo huno fiku laha maeno lami'niye. 7 Kalaisipi'mo mai'nonageno'ae'mo Goti'a lusi kava huno fiku hapa maeno ne'apamiya kava'amo mago kagemi ya'agana huno male'niya kava'alefe'mo Yesu kola'aleti'mo miya faino hatu maeno late'niya hosu kavatie'mo afa'a ateyo, huno laha pai'niye. 8 Lusi kava huno laha maeno nelamino'ae'mo ageteta ne'afuna kava'e alagepa huta lagesamo ne'afuna kavati'e'mo alino lami'nigeta ali'none. 9 Hau'niya kavatefe'mo ani kava'mo huguve, huno agesamo afiteno lokiya gemo hu male'niya kava'mo hogoteno alino fala ki male'niya'monanafa hemenimo ago alino lave li'niye. 10 Agesamo afino hu maleteno'ae'mo, hu male'nova afina'mo afole aisige'nae'mo muki koku'napi vaya'e ma mopafi vaya'e'mo ali'na anupa hu'na apatesugeno Mafa'ne'nimo'mo yagaino apategaiye, huno hu'niye. 11 Mafa'ne'apimogimo muki afo'apimogi ya'mo ne'aliya kava huta Goti'a muki male'niya ya'amo alisunafe'mo agaemo muki kava'amo hisiyafe'mo hau'nigeno agai'amo ani kava'mo huguve, huno hu'niya ge'ale'mo akame huno nehiya Goti'a huno'ae'mo mafa'ne'nimo maigae, huno hu male'niye. 12 Goti'a lagaeteti'mo ha le konali ya'amo alino apave lisige'a agete'apae'mo agi'ale'mo ali'a asaga hu'a atesayafe'mo mafa'ne'nimo maigae, huno hu male'niye. Lagaemo Yu vaya'mogita hogoteta Kalaisife'mo, laha maegaiye, huta hu'none. 13 Ani kava hutapa lapakae'e'mo alagi mani lama gemo lapau ne'vaiya kavatefe'mo alagepa faigoko ge'amo afitetapae'mo, laha maegaiye, hutapa hu'nae. Lapakaemo Kalaisife'mo lapakesa afita fatago hu'nageno'ae'mo Goti'a polomasi gemo huno'ae'mo, Naune'name'mo ali'na apamiguve, huno hu male'niya Auneme'amo alino lapamiteno'ae'mo lapaipafi'mo alagena ya'amo ago hu male'neno, vaya'nimo mai'nae, huno lapa pai'niye. 14 Goti'a alino lamisiyafe'mo male'niya yapati'mo Auneme'amo ago alino lami'niya'mofe'mo ago afi'nonana miya faino late'niya vaya'amo alagi hatu maeno lateteno lavalelino haisigeta muki ya'amo aligune. Agaemo ha le konali ya'amo alino apave lisige'apae'mo agi'ale'mo ali'a asaga hu'a atesayafe'mo ani kava'mo hu'niye.

Polo'a nunumu'mo hu'niya gemae

15 Hu'niya'mofe'mo lapakaemo Ala kava ne'mo Yesufe'mo lapakesa afita fatago nehutapa Goti apaote vaya'ae'mo lapau lapayamopafi'mo nelapaiya kavafe'mo lapava gemo afite'nae'mo 16 Gotifeke'mo hao ke he'na nelapate'na muki afina'mo o'atale'na nunumu'mo hu'na nelapatove. 17 Nagaemo Ala kava netimo Yesu Kalaisi Goti'amo ha le konali ya'age vekae'mo nunumu hu'nae'mo, Kaunekame'mo alika apamige'apao alagepa apaipa apakesamo ali'ne'a kage'a alagepa hu'a apakesa afi'a fatago hiyo. 18 Apakaefe'mo keya aeka ge hu'nanage'apae'mo e'a apamisana yafe'mo apavayagunagu hu'a agava ne'maiye. Ha le yakamo alika apamiteka apaipafi apaulagamo alika ayakeka atege'apao mafa'ne'apimogimo muki afo'apimogi ya'mo ne'aliya kava huka apaote vaya'aina hetama'apimo alika apamisanage'a agete'apae'mo, ha le konali ya'amo alagepa kanale ya'mo hane'niye, hu'a agava maiyo. 19 Kagaemo lagaetegamo lusi kava huka aeno apakase'niya lokiyakaleti'mo kayamufa'age lokiya kava'mo hu'nananageka hemeni'e'mo nehane. Lokiyakaleti'mo kayamufa'age kava'mo huka Kalaisi agufafi'mo kayamukiki huka ali'ya'mo aliteka fali'niyateti'mo ago alika he tika ateteka lamaga kahaopale'mo avalelika haika ate'nana kava'mo huka laipafi'mo ani agufa kayamufa'age kava'mo huka ali'ya'mo ali'nanageta lagesa afita fatago nehune. Mani kayamufa'age kava'mo alika apave liyo, hu'na nunumu'mo hu'na nelapatove. 21 Kalaisi'a koku'napi'mo mai'neno'ae'mo hemenimo yagai'a ne'apataya vayanagi enisole vayanagi himamu vayanagi ala kava vayanagi ala apaki vayanagi huno ago aeno apakaseno hemenimo yagaino ne'apateyanageno henaga'amo afole aisiya afina'e'mo ani kavake'mo huno yagaino apategaiye. 22 Goti'a muki ya'e vaya'e'mo Kalaisi aiyafi'mo alino apateteno hogote vekamo yagaino ne'apateya vekamo siosi vaya'aite'mo yagaino apatesiyafe'mo avaleno apami'niye. 23 Siosi vaya'mo Kalaisi agufa'amo mai'nae. Siosi vaya'amo o'mai'naesinana agenopa'age'mo hane'niyesina'monanafa Kalaisi siosi vaya'amo mai'naya'mofe'mo muki agufafi ya'amo hane'nigeno alagepa huno ne'maiye. Agaemo muki haopalegamo mai'neno'ae'mo muki yate'e vaya'aite'e'mo yagaino ne'apateya vekamo mai'niye.